Körfuboltaæfingar fyrir börn með sérþarfir hefjast næstkomandi sunnudag

Líkt og síðasta vetur standa íþróttafélögin Þór og KA fyrir sameiginlegum íþróttaæfingum í Naustaskóla fyrir börn með sérþarfir. Í sumar voru sérhannaðar fótboltaæfingar í Boganum en nú er boðið upp á körfuboltaæfingar. Æfingarnar eru hugsaðar fyrir börn sem þurfa sem dæmi meiri stuðning, hentar betur að vera í minni hópum og hafa aðgengi að fleiri þjálfurum á æfingum. Allir ættu að geta tekið þátt og eru allir velkomnir.  

Fyrsta æfing vetrarins verður næstkomandi sunnudag, 19. október. kl. 11:00 í Íþróttahúsi Naustaskóla.

Íþróttaæfingarnar fylgja markmiðum verkefnisins ALLIR MEРþar sem markmiðin eru m.a.

• Að öll börn og ungmenni eigi möguleika á því að taka þátt í íþróttum í sínu nær umhverfi í samræmi við óskir sínar og þarfir – með viðeigandi aðlögun.
• Að allir eigi kost á að öðlast reynslu af þátttöku í íþróttum og verða sér úti um leikni til að þróast í öryggi og góðum félagsskap.

Nánari upplýsingar og fyrirspurnum svara íþróttafulltrúar Þórs og KA í tölvupósti, linda@thorsport.is og siguroli@ka.is