Íþróttafólk Akureyrar

REGLUGERÐ UM ÍÞRÓTTAFÓLK AKUREYRAR

1. grein
Velja skal íþróttakarl og íþróttakonu til titilsins Íþróttafólk ársins á Akureyri.

2.grein
Titilinn íþróttafólk Akureyrar skal að jafnaði veita íþróttamönnum 16 ára eða eldri.

3. grein
Íþróttafólk ársins geta einungis orðið þeir einstaklingar sem keppt hafa með aðildarfélagi Íþróttabandalags Akureyrar, ÍBA, á liðnu ári.

4. grein
Íþróttafólkr ársins skal valið eftir árangri í íþróttagrein sinni og framkomu jafnt í keppni sem utan vallar.  Aðildarfélög ÍBA senda inn tilnefningar til kjörs um Íþróttafólk Akureyrar. Æskilegt er að félögin tilnefni bæði íþróttakarl og íþróttakonu. Mikilvægt er að öllum tilnefningum fylgi greinargerð um íþróttaafrek og annað það sem verðugt er að komi fram um viðkomandi íþróttamanneskju. Hafi margir aðilar innan félags náð framúrskarandi árangri og verið til fyrirmyndar í sinni grein mega félögin senda inn fleiri tilnefningar. Stjórn Afrekssjóðs Akureyrar er jafnframt heimilt að bæta við tilnefningum sbr. 4. gr. í samþykktum Afrekssjóðs ef ástæða þykir til.

5. grein
Stjórn Afrekssjóðs Akureyrar velur 10 einstaklinga af hvoru kyni sem kosið er á milli með tvennum hætti.

Annars vegar hefur stjórn og framkvæmdastjóri ÍBA, Fræðslu- og lýðheilsuráð Akureyrarbæjar, forstöðumaður íþróttamála hjá Akureyrarbæ, starfsmaður ÍSÍ á Akureyri, ásamt þeim fjölmiðlum sem staðsettir eru á Akureyri og fjalla um íþróttir, rétt til þátttöku á vali á Íþróttafólki Akureyrar sem gildir 70% á móti rafrænni íbúakosningu.

Hinsvegar geta íbúar Akureyrarbæjar, 18 ára og eldri, haft áhrif og kosið með rafrænni íbúakosningu í gegnum þjónustugátt Akureyrarbæjar. Niðurstaða íbúakosningar hefur 30% vægi.

6. grein
Valið fer þannig fram að hver aðili hefur 58 stig til umráða fyrir hvort kyn og skal velja 10 einstaklinga í aðskildri kosningu í samræmi við eftirfarandi stigatöflu. 

Stigahæsti íþróttakarl og stigahæsta íþróttakona skulu krýnd Íþróttafólk ársins á Akureyri.

1. sæti 12 stig
2. sæti 10 stig
3. sæti 8 stig
4. sæti 7 stig
5. sæti 6 stig
6. sæti 5 stig
7. sæti 4 stig
8. sæti 3 stig
9. sæti 2 stig
10. sæti 1 stig

Verði tveir einstaklingar (eða fleiri) jafnir að stigum í ákveðnu sæti skal sá einstaklingur verða ofar í verðlaunaröð sem oftar hlýtur hærri stig í kosningu.  Verði einstaklingar jafnir á hæstu tölu, skal telja saman næsthæstu tölu og koll af kolli þar til niðurstaða fæst í verðlaunaröð.

7. grein
Val íþróttafólks ársins skal birt í janúarmánuði næsta árs.

8. grein
Undirbúningsnefndin tekur til starfa að minnsta kosti einum mánuði fyrir útnefningu.

Samþykkt á ársþingi ÍBA 27. apríl 2026.